有貓嘅屋企一樣用得電動梳化，揀嗰陣睇多四樣：面料耐唔耐抓、梳化底封唔封實、電安唔安全、日常易唔易清。呢篇逐樣講，最後列出我哋啱有貓屋企嘅電動梳化。想直接睇款式同價錢，去貓抓布梳化分類頁。
1. 面料：揀耐貓抓嘅寵物布
貓貓抓梳化，最常見係爪尖勾住紗線，一扯就勾紗、起毛。寵物布（坊間叫「貓抓布」）織得密，爪尖冇咁易勾得入，所以比一般梳化布耐抓。我哋嘅寵物布係 100% 聚酯纖維，耐磨測試（Martindale）超過 25,000 轉，拉伸強度超過 500 N，表面有防潑水處理。
要講清楚：冇任何布或者皮可以完全防止抓痕，貓貓日日抓同一個位都有機會留痕。梳化旁邊放返塊貓抓板、定期幫貓剪甲，梳化會靚得耐啲。
想要皮面要留意，普通真皮怕貓爪，刮花咗好難修補。寵物布嘅好處、缺點同測試數據，睇寵物布梳化推薦同貓抓布梳化攻略。
2. 梳化底：封實，貓貓鑽唔入
貓貓鍾意鑽入梳化底，而電動梳化底有機件，所以有貓嘅屋企最好揀封底嘅款式。
用邊款都好，開合電較之前望一望，睇清楚貓貓唔喺腳踏或者梳化附近先撳掣。
3. 電：梳化入面只行 29V 低壓電
我哋嘅電動梳化，摩打同控制器行 29V 低壓直流電，真正接 220V 嘅只有插喺牆嘅火牛。火牛係雙重絕緣（Class II），按英國 BS EN 61558 標準做過絕緣、溫升同短路測試。火牛同電線收喺梳化後面，貓貓就冇咁易咬到。
每樣零件做過咩測試，睇電動梳化安全攻略；屋企有細路，睇埋寵物同小朋友家庭嘅電動梳化指南。
4. 擺位：零靠牆，梳化後面唔使留位
舊式電動梳化要離牆預留 10cm，電較先打得開。零靠牆梳化完全貼牆擺放，一樣可以開盡全部電較，細廳可以慳返個位。擺位點計睇零靠牆擺位攻略。
啱有貓屋企嘅電動梳化
以下款式全部可以揀寵物布。闊度係每款可以揀嘅尺寸。
| 款式 | 闊度 | 有貓屋企睇呢度 |
|---|---|---|
| Bellagio | 165cm、180cm、196cm、274cm、353cm；單座 76cm | 全密封底座；零靠牆；扶手入面有儲物格 |
| Brooks | 147cm、173cm、183cm、259cm | 全包底座；零靠牆；兩邊座位都係電動貴妃 |
| I307 | 114cm、150cm、165cm | 零靠牆；闊 114cm 起，細廳都擺得落 |
| I301 | 132cm、168cm、185cm | 零靠牆；高背包身，可以揀六電動 |
唔一定要電動嘅話，PawsLounge 內置貓屋同樓梯，貓貓有自己個竇，樓梯同櫃桶可以收納寵物用品；闊 186cm，唔係電動。
其他可以揀寵物布嘅款式喺貓抓布梳化分類頁；淨係睇電動，去電動梳化分類頁。
日常清潔
寵物布用清水就夠，唔使買清潔劑。
| 情況 | 點處理 |
|---|---|
| 日常 | 每星期吸塵一次，座位罅隙都吸埋；貓毛用黐毛轆 |
| 飲品倒瀉 | 即刻用乾布按壓吸乾，再用半乾毛巾順紋抹 |
| 一般污漬 | 微濕軟布順紋輕抹，再用乾布印乾；唔好轉來轉去用力擦 |
| 嘔吐、便溺 | 先用紙巾執走，唔好壓入布面；用乾布吸乾，再用半乾毛巾順紋抹 |
切勿用熱水、酒精、漂白水、嬰兒濕紙巾或者其他清潔劑，以免面料褪色或者受損。大部分款式嘅布套係固定嘅，唔可以除落嚟洗。
落單前最多人問
有貓可唔可以用電動梳化？
可以。揀封底嘅款式，例如全密封底座嘅 Bellagio 或者全包底座嘅 Brooks，貓貓鑽唔入梳化底；開合電較之前睇清楚貓貓喺邊。
寵物布會唔會俾貓抓花？
有機會。寵物布織得密、抗勾絲，貓爪冇咁易勾到紗，但冇任何布或者皮可以完全防止抓痕，所以我哋只會講「耐貓抓」。
有貓揀布定揀皮？
多數有貓嘅客人會揀寵物布：耐抓、易抹，坐落透氣唔黐身。想要皮面，可以喺產品頁「物料」揀生態牛皮或者頭層真皮；落單前 WhatsApp 我哋，講低屋企隻貓抓唔抓梳化，我哋話你知邊隻皮比較啱。
保養包唔包貓抓花？
唔包。保養包結構、電較同開關；面料，以及寵物或者利器造成嘅刮痕同破損都唔包。ITALO MODA 系列標準保養 10 年；I 字頭型號（例如 I301、I307）屬 INITIAL 系列，標準保養 1 年，可以加配升級至共 10 年。條款睇保養計劃。
網上點落單？幾耐送到？
喺產品頁揀好尺寸、物料同功能，加入購物車就可以網上落單，落單後有專人聯絡你約送貨日子。梳化係訂造，喺產品頁揀送貨區份，就睇到最快幾時送到。網上價錢已包送貨上門同組裝，離島、抬樓梯等另計。想試坐可以去 7 間門市，但唔係必要。
