梳化說明書：收貨、電動功能、清潔同保養一次睇晒

最後更新：2026 年 10 月 ｜ Italo Moda 團隊

收貨當日：簽收前要檢查咩？

師傅喺度嘅時候逐樣試，冇問題先喺送貨單簽名。簽收之後，非保養範圍嘅問題（例如花痕、漏送配件）就好難再跟進。

• 尺寸：梳化係人手製作，成品同標示尺寸有 ±2 吋（約 5cm）以內差異屬正常。
• 收貨人：要年滿 18 歲，並代表你檢查同簽收。
• 現場拆裝過：如果要拆開先入到屋，之後自己再移動梳化，車線有機會對唔齊，移位前可以 WhatsApp 問我哋。

新梳化頭幾個星期：邊啲情況係正常？

梳化經過長時間運送先到你屋企，加上新海綿、新皮料要時間「坐熟」，以下情況大多數會自己改善。

如果異響越嚟越大、電較郁唔到，或者凹陷一直唔回復，就唔屬正常，請報維修。

電動梳化點用先安全？

電動位要撳住掣先會郁，鬆手即停。最重要一條：起身前要先收起腳鉸。

• 擺位：舊式電動梳化要離牆預留約 10cm，電較先打得開；零靠牆款可以完全貼牆擺，一樣開盡全部電較。前面要預留位俾腳踏伸出，茶几同地氈唔好擋住腳踏，兩側唔好貼住櫃或者牆角，避免開合時夾到。擺好之後開盡試一次，確認前後都唔會撞到。
• 用之前望一望：開合前確認腳踏同座位底冇小朋友、寵物、毛氈、衣物或者雜物。
• 小朋友唔好玩掣：只由坐喺位上嘅人操作。收腳踏時腳踏會向下摺，小朋友手腳要遠離。
• 唔好企、唔好坐喺打開咗嘅腳踏上：腳踏只係承托一個人雙腳嘅重量，唔好俾小朋友或者寵物坐上去。
• 慢慢坐低：唔好成個人大力挨落椅背，坐喺座位中間，唔好挨落座位兩側或者坐扶手，電較會受力扭曲。
• 相鄰兩個位：一個位放低咗椅背、隔籬位係直身，兩者之間嘅空隙唔好放手，椅背收返時會夾到。
• 唔用嘅時候收返直身：唔好長時間放住腳踏，避免小朋友或者寵物爬入梳化底。
• 承重：每個座位最多承重 136kg，一個位只坐一個人。
• 摩打要休息：連續開合 2 分鐘之後，停一陣（約 20 秒）先再用，唔好不停撳住掣開開收收。
• 唔好喺梳化上面彈跳：會令結構同電較受力變形，亦唔包保養。
• 開關款式：可能係扶手側嘅 Type-C 按鈕、輕觸式按鈕或者遙控，按合同揀嘅款式而定。遙控記得放好，唔好壓喺座墊底。
• 火牛：有啲款每個電動位一個火牛，有啲款幾個位共用一個，以收貨數量為準。火牛直接插牆身英式插座，唔好用轉插或者經拖板。火牛同電線唔好擺入梳化底或者機械入面，電線唔好夾喺活動位同地下之間，亦唔好壓喺地氈底。電線要預留足夠長度，梳化開合時唔會扯實。
• 每月望一望火牛同電線：有冇破損、插頭有冇鬆，火牛要遠離暖爐等熱源。有破損就唔好再用，WhatsApp 我哋補配件。
• 拔插頭要揸住插頭：唔好扯條線；濕手唔好掂插頭同遙控。
• 搬梳化、清潔底部之前：先拔插頭。
• 雷暴、長時間唔用：拔插頭最穩陣。
• 明火同煙頭：遠離梳化，布面同海綿遇火會燒得好快。

想了解摩打、火牛做過咩安全測試，可以睇電動梳化安全攻略。

USB / Type-C 充電位

充電位方便叉手機，但插頭係精細零件，最怕大力扯、斜插同濕水。

• 插拔要對正直入直出，唔好斜插或者拉住條線拔。
• 唔好喺插住線嘅時候開合電較，避免條線被扯住。
• 用乾棉花棒清潔插位，唔好用濕布塞入去。
• 濕水點算：即刻拔火牛插頭，用紙巾吸乾（唔好用風筒），斷電 24 至 48 小時先再用。

想知點樣叉得最快，可以睇 USB 快充實測。

開關發熱、有焦味點算？

梳化入面嘅摩打、開關同 USB 位全部行 29V 直流電，按香港電力規例屬「特低電壓」（直流 120V 以下），發熱、著火風險極低。

真正接 220V 嘅只有插喺牆嘅火牛，火牛符合香港《電氣產品（安全）規例》，有安全規格證明書。如果真係發現發熱或者焦味，為安全起見，請即刻停用、拔咗插頭，唔好再撳掣試：

1. 拔火牛插頭，唔好再開合電較。
2. 影低發熱或者有異味嘅位置（開關、火牛、電線），有異響可以拍段短片。
3. WhatsApp 我哋，附上銷售合同號碼，我哋會盡快安排跟進。

電動唔郁？報維修前自己檢查

好多「電動唔郁」其實係插頭鬆咗或者有嘢卡住，試以下 5 步，通常幾分鐘就搞掂。

1. 插座有冇電：插盞燈或者叉電器試下，牆掣有冇開；梳化要直接插牆，唔好經拖板。
2. 睇火牛燈：燈有冇着。如果火牛有裂痕、焦味或者異常發熱，唔好再插，直接報維修。
3. 重新開機：拔插頭，等 1 分鐘再插返。
4. 插實接駁位：拔咗牆身插頭先，再將火牛去梳化底嘅插頭、開關線插頭拔出再插實。組合梳化記得檢查每組之間嘅接駁位。
5. 有冇嘢卡住或者壓住掣：座位底同腳踏有冇雜物，電線有冇被夾住；咕臣、遙控或者雜物有冇壓住開關，令梳化唔聽使。

郁得比平時慢：睇下座位上面有冇超重，或者連續用咗太耐，停一陣再試。全部位都唔郁：先查插座、火牛同主電線。得一個位唔郁：同正常嗰個位比較，睇下火牛燈同插頭有冇分別。

試完都唔得，拍段撳掣嘅短片，連同合同號碼 WhatsApp 報維修。

日常清潔：唔同面料點抹？

清水至上：微濕軟布沾室溫清水輕抹，再用乾布抹乾。

• 真皮：每半年用一次皮革護理霜，保持皮面滋潤。
• 濕咗：放喺陰涼位置等完全乾透先再用，唔好用風筒或者曬太陽。
• 按鈕：每月用清水噴喺布上（唔好直接噴落掣）輕抹。

更詳細嘅污漬處理，可以睇電動梳化清潔教學。

擺位同日常保養

太陽、熱力、潮濕同不當受力，係梳化老化最常見嘅原因。

• 離熱源最少 30cm：暖爐、暖氣出風口持續受熱會令真皮老化、變硬乾裂。
• 避免太陽直射：長時間曬會令皮面同布料褪色，較高級數嘅真皮更唔好擺窗邊。
• 避免長期潮濕：唔好貼住滲水牆身，潮濕天氣開抽濕機。
• 輪流坐唔同位：長期只坐同一個位會令座位凹陷，記得定期拍打、用手整理皮面。
• 咕臣同靠枕：每星期拍鬆一次，可以調位嘅就輪流調位，受力平均啲。
• 每星期吸塵：特別係座位罅隙，避免硬幣、玩具等異物卡住電較路軌。
• 搬梳化要兩個人、由底部抬起：先拔插頭、收埋腳踏，組合梳化先拆開逐組搬。唔好拉扶手、靠枕、座墊、腳踏或者拖行，邊位受力容易裂開變形。

真皮、寵物布、生態皮嘅特性

真皮

真皮屬天然材料，以下情況屬正常：皮紋粗幼不同、皮疤、皮鬆、皮皺；顏色因光線或者角度有深淺差異；半皮款式嘅真皮同仿皮部分顏色或者有少許差異；坐感、坐高或者同門市陳列品略有不同。真皮有皮料氣味亦屬正常。

親親寵物布、貓抓布

主要特性係高耐磨、抗勾絲、防潑水、易清潔，但唔代表完全防止刮痕或者破損。任何由寵物或者利器造成嘅損壞，均不在保養範圍內。

生態皮

主要特性係高耐磨、抗污、濕抹即淨，但同樣唔代表完全防止刮痕或者破損，寵物或者利器造成嘅損壞不在保養範圍內。

家有小朋友同寵物，可以再睇寵物 / 小朋友家庭電動梳化指南。

保養包咩、唔包咩？

原廠保養包結構、電較同開關，包上門零件人工；面料同消耗品唔包。

以下情況唔包保養：

• 不正當使用：彈跳、企喺梳化上、坐扶手、拖行、撞擊。
• 長期潮濕、自行拆開或者改裝。
• 寵物或者利器造成嘅損壞。
• 人為損壞導致充電頭不能充電，或者冇用直角頭充電線導致 Type-C 充電頭損壞。
• 面料，同消耗品：座墊棉、背墊棉、扶手棉、布套、皮套。
• 陳列品。

記住：

• 保養只適用於銷售合同上嘅送貨地址，搬屋前請先 WhatsApp 我哋。
• 申請保養要出示銷售合同，並已登記電郵。
• 送貨滿 1 個月後，每次上門檢查收 HK$100 車費。

上廠維修收費、加配保養（INITIAL 延長至共 10 年、ITALO MODA 升級終生保養）等詳情，請睇保養條款。

點樣報維修？

準備好合同號碼同相片，WhatsApp 我哋就得。

1. 搵返銷售合同號碼。
2. 影相：成張梳化一張、問題位置近鏡一張，盡量喺日光下影。
3. 電動問題拍短片：撳掣嗰下有咩反應、有冇聲，拍低會快好多。
4. WhatsApp 我哋：同事會按情況安排上門檢查、補配件（例如火牛、遙控），或者收梳化返廠維修。上廠維修一般大約 10 至 14 日送返。

梳化說明書常見問題