高品質梳化睇六樣：皮料、坐墊、框架、電動部件、尺寸同訂造、保養。前三樣決定坐得舒唔舒服、用得耐唔耐，後三樣決定買返屋企之後有冇手尾。呢篇逐樣講要問清楚啲咩。想直接睇款式同價錢，去全部梳化。
高品質梳化 6 個檢查位
| 檢查位 | 要問清楚 |
|---|---|
| 1. 皮料 | 頭層皮定二層皮；半皮定全皮 |
| 2. 坐墊 | 坐感偏軟定偏硬；新梳化同陳列品坐落有咩分別 |
| 3. 框架 | 框架用咩料；結構保養幾多年 |
| 4. 電動部件同膠水 | 摩打、火牛、膠水有冇做過測試 |
| 5. 尺寸同訂造 | 擺唔擺得落、入唔入到屋；可唔可以改尺寸 |
| 6. 保養 | 保幾耐；包咩、唔包咩；上門要唔要收費 |
1. 皮料：頭層皮定二層皮、半皮定全皮
頭層牛皮係牛皮最表面嗰一層，纖維最緊密，所以耐用、透氣。二層皮係剖開之後下面嗰層，要靠表面塗層，耐用度差啲。我哋嘅真皮梳化用頭層真皮。
跟住要問半皮定全皮：
- 全皮：成張梳化每一面都係真皮。
- 半皮：坐位、扶手等接觸位用真皮，其餘位置配仿皮；真皮同仿皮色澤會有少許差異。
真皮係天然材料，皮紋粗幼不同、有皮疤同皮皺都屬正常。屋企有貓狗嘅話，真皮俾貓抓會留痕，寵物布啱啲：耐抓、防潑水、易抹。詳細睇真皮梳化值得買嗎同貓抓布梳化好唔好。
2. 坐墊：睇坐感，唔好淨係睇厚度
- 睇坐感刻度：大部分梳化嘅產品頁有「坐感」刻度，寫明偏軟、適中、偏硬定特硬。鍾意成個人陷落去揀偏軟；腰背想多啲承托揀偏硬。
- 新梳化要坐熟：新梳化嘅海綿同皮料要時間坐熟，初初會比門市陳列品硬、坐得高，正常使用一段時間就會軟身。
- 輪流坐唔同位：長期只坐同一個位會令座位凹陷，記得定期拍打、用手整理。
- 座墊棉係消耗品：座墊棉、背墊棉同扶手棉唔包保養，所以落單前要揀啱坐感。
3. 框架：問清楚用咩料、結構保幾多年
框架喺梳化入面，買嗰陣睇唔到，所以要問兩樣：框架用咩料，結構保養幾多年。
- 用料：睇產品頁有冇寫明。例如 LAVIN 同 SOLO 嘅產品頁列明用北美實木框架。
- 結構保養：ITALO MODA 系列標準保養 10 年，包結構、電較同開關。
- 日常點用：唔好喺梳化上面彈跳、企上去或者坐扶手，會令結構受力變形，亦唔包保養。
實木同夾板有咩分別，睇實木框架同夾板梳化有咩分別。
4. 電動部件同膠水：問有冇做過測試
電動梳化多咗摩打、火牛同控制器。「整張梳化有認證」通常講唔清係測咩，摩打、火牛、膠水要分開問。我哋嘅做法：
- 摩打：經德國 TÜV SÜD 做電磁兼容（UKCA EMC）測試。
- 火牛：按英國 UKCA 電氣安全標準 BS EN 61558 測試。梳化入面只行 29V 低壓直流電，真正接 220V 嘅只有插喺牆嘅火牛。
- 膠水：黏海綿同框架嘅噴膠經 SGS 按歐盟 RoHS 驗過，10 種限制物質全部未檢出。
- 寵物布：經 Intertek 驗甲醛，結果未檢出（ISO 14184-1）。
每項測試測咩、點解重要，睇電動梳化安全測試。
5. 尺寸同訂造：擺得落、入到屋
- 度牆位：梳化總闊最好比牆位窄 10cm 或以上；梳化深度加茶几，再留大約 60cm 行位。
- 度入屋路線：大門、lift 門同走廊轉角嘅闊同高。入唔到屋要拆件重裝，會另外收費。
- 電動款睇埋梳化後面：舊式電動梳化要離牆預留 10cm，電較先打得開。零靠牆梳化完全貼牆擺放，一樣可以開盡全部電較。
- 訂造：大部分款式可以按你屋企空間逐吋改尺寸。訂造尺寸請落單前先 WhatsApp 我哋確認。
點度、每款幾闊幾深，睇梳化尺寸攻略。
6. 保養：睇年期，亦要睇包咩
| 系列 | 標準保養 | 範圍 |
|---|---|---|
| ITALO MODA | 10 年 | 結構、電較、開關，包上門零件人工 |
| INITIAL（I301、I307 呢啲 I 字頭型號） | 1 年，可以加配升級至共 10 年 | 結構、電較、開關，包上門零件人工 |
以下情況唔包保養：
- 面料同消耗品：座墊棉、背墊棉、扶手棉、布套、皮套。
- 寵物或者利器造成嘅損壞。
- 不正當使用：彈跳、企喺梳化上、坐扶手、拖行、撞擊。
- 長期潮濕、自行拆開或者改裝。
申請保養要出示銷售合同。保養只適用於銷售合同上嘅送貨地址，搬屋前請先 WhatsApp 我哋。送貨滿 1 個月後，每次上門檢查要收車費。條款同收費睇保養計劃；日常點用、點清潔睇電動梳化保養、清潔同維修。
落單前最多人問
Italo Moda 梳化保養包啲咩？
ITALO MODA 系列標準保養 10 年，INITIAL 系列（I 字頭型號）1 年，可以加配升級至共 10 年。保養包結構、電較同開關，包上門零件人工；面料、座墊棉，以及寵物或者利器造成嘅損壞都唔包。
邊款梳化可以改長度，或者換第隻色嘅皮？
大部分款式可以按你屋企空間逐吋改尺寸，落單前先 WhatsApp 我哋確認。皮色方面，喺產品頁「物料」揀半皮或者全皮，再揀皮級同顏色；視乎款式，有 A、C、D、F 等皮級。顏色實物相喺面料顏色頁。
新梳化坐落比門市嗰張硬，正唔正常？
正常。門市陳列品已經俾好多人坐過，新梳化嘅海綿同皮料要時間坐熟，所以初初會較硬、較高。正常使用一段時間就會軟身。
門市喺邊？係咪一定要去試坐？
我哋有 7 間門市，地址睇門市地址。想試坐可以去，但唔係必要：網上揀好款式、尺寸同物料就可以直接落單。
點睇其他客人嘅評價？
各產品頁有用家評價可以睇。想了解多啲我哋嘅用料，睇點解揀 Italo Moda。
網上點落單？幾耐送到？
喺產品頁揀好尺寸、物料同顏色，加入購物車就可以網上落單，落單後有專人聯絡你約送貨日子。梳化係訂造，喺產品頁揀送貨區份，就睇到最快幾時送到。網上價錢已包送貨上門同組裝，離島、抬樓梯等另計。
